Det er full fart hos Trucknor, Frydenbø Bil og Intakt på Sandane. Her finn du sju jenter som er lærlingar og fagarbeidarar i ulike bilfag. Dei tre bedriftene satsar på lærlingar, og sikrar seg framtidas arbeidskraft.
På Sandane er det høg aktivitet. Hos Trucknor finn du Maria som tok fagbrev i tunge køyretøy i fjor. Når du kjem inn på Frydenbø Bil, treff du Magdalena som er lærling på delelageret, og på verkstaden finn du Natalia, Cassandra og Carina medan dei skrur på lette køyretøy. Hos Intakt er lærlingane Sanne og Thea i full gang med å reparere lakken på fleire bilar. Dei har alle litt ulike utdanningsvegar, men det viktigaste er at dei trivast med å jobbe praktisk.
Får heile utdanninga heime
I Sogn og Fjordane er billakkerar-linja lagt ned, og ein må til Bergen for å ta utdanninga. For Sanne og Thea låg det langt inne å skulle flytte heimefrå og til Bergen. Lærebedrifta Intakt inngjekk eit samarbeid med Vestland fylkeskommune og jentene fekk eit tilpassa løp der dei heile utdanninga er på Sandane. No tek dei to jentene eit år skule, og tre år som lærling for å bli billakkerer.
Yrkessjåfør på sikt
Maria Hjelle var lærling hos lastebilselskapet Trucknor. Ho har eit år på Teknologi- og industrifag (TIF) på Nordfjordeid og eit år i Førde bak seg før ho gjekk læretida på Sandane. No har ho fagbrev i tunge køyretøy.
– Eg likar godt lastebilar og ønskjer å bli sjåfør på store køyretøy på sikt, men det kan vere godt å vite korleis ein lastebil er bygd opp og korleis alt fungerer, seier ho.
Her er alle velkommen
Fellesnemnaren for alle jentene er at dei er svært godt mottekne og trivast i lærebedriftene. – I ei tid der det er vanskeleg å få nok fagarbeidarar bør interesse og eit ønskje om å lære være det viktigaste. Derfor er det eit heilt naturleg val for oss å ta inn jenter som lærlingar. Dei er hardtarbeidande og tilfører nye perspektiv, seier Jo Inge Solberg, dagleg leiar i Frydenbø Bil.
Nye lærlingar kvart år
Kvart år vert det tatt inn nye lærlingar, og det er stor sjanse for å få eit tilbod om fast jobb her etter ein har tatt fagbrev. Jo Inge peikar på Bilbransjens opplæringskontor Sogn og Fjordane som ein viktig medspelar som legg til rette og følgjer opp lærlingane med kurs, og syter for at dei er godt førebudde når fagprøva står for dør.
