Klar for framtida med splitter ny opplæringsbil

Dei tilsette i opplæringskontoret, ordførar Jenny Følling, gjengen i Auto 8-8, lærlingar og neste års lærlingar var samla under den store avdukinga av ny opplæringsbil.

5. juni var ein stor dag for Bilbransjens opplæringskontor Sogn og Fjordane. Ford har levert ut 20 bilar til opplæringskontor i heile landet, og BOK-sfj er ein av dei utvalde opplæringskontora som fekk ta imot ein splitter ny bil. På avdukingsdagen møtte både lærlingar, elevar, samarbeidspartnarar og ordførar Jenny Følling opp for å markere overrekkinga saman med gjengen frå Auto 8-8 Førde, som stilte på vegne av Ford.

Den nye opplæringsbilen er ein prototype av elektriske Ford Explorer, levert av Ford Motor Company og Auto 8-8. Prototypen blir brukt for å dokumentere at alt det tekniske og tryggleiksmessige er på plass i modellen før dei startar med serieproduksjon. Derfor er bilen fullt utstyrt med alt av ekstrautstyr, moderne teknologi og gromme felgar. Enn så lenge er bilen også i ein del.

Dagleg leiar Roald Standnes er stolt eigar av den nye bilen. Opplæringskontoret på Sunnmøre har også fått ein opplæringsbil og dei skal dele kunnskap mellom seg for å sikre best mogleg læringsutbytte for elevane.

Dette er ein stor dag, fortel Jenny Følling under sin tale.

Elektriske bilar er blitt kvardagen

Hans Erik Nødset er daglig leiar i Auto 8-8 og var den heldige som fekk lov å avduke den nye bilen. Det er kjekt for oss at Ford har så mange bilar til rådigheit som dei no delar ut. Den opplæringa som elevane no får hos BOK-sfj er heilt nødvendig slik at dei er klare for å skru på dagens bilar, seier han.

Bilbransjen er i endring og elektriske bilar har gått frå å vere framtida til å bli ein naturleg del av kvardagen til mekanikarar. Norge er klart i front i den elektriske bil-revolusjonen og i dag er 98 % av nye bilar elektriske. Bilane er fulle av teknologi, sensorar og avanserte system. Det betyr at krav til kompetanse og opplæring blir endra.

Hans Erik Nødset, dagleg leiar i Auto 8-8, fekk æra av å avduke bilen.

Ingen feiring utan kake.

Skal lage undervisningsopplegg for elevane

Thomas Einen er opplæringskonsulent på lette køyretøy hos BOK-sfj, og meiner det er viktig at opplæringa heng med i utviklinga. Bil er for dei fleste den nest dyraste materielle eigedommen dei har. Når vi no får ein splitter ny bil i hus, så skal vi vere eit eksempel for ungdommane på korleis dei behandle bilane som kjem inn på verkstaden, fortel han.

Han er også spennklar no som bilen er komen i hus og dei endeleg kan finne ut korleis bilen kan brukast best mogleg i opplæringa. Planen er å demontere bilen for å lage ulike stasjonar til undervisning. Her skal lærlingar og elevar få prøve seg med reparasjon og vedlikehald.

Eg har vel sånn sett gått rundt og trippa i nokre veker og tenkt mange tankar på korleis bilen kan brukast. No er eg berre veldig glad for å få den i hus, og gler meg til å demontere den etter kvart, ler Thomas.

Erfaring og kompetanse på plass

Vi har også kompetansen som trengst for å få mest mogleg ut av den nye opplæringsbilen. Opplæringskonsulent Inge Jeppesen har tidlegare jobba på Auto 8-8 i Florø og er Ford Master-teknikar. Han har god kunnskap om korleis bilane er bygde, og her er også Ford med på å vidareformidle viktig kunnskap.

Ford er ikkje berre generøse med å dele ut opplæringsbilar. Dei leverer også ut dei interne lærebøkene om bilen, med all informasjon om korleis bilen fungerer. Det gjer det enklare for oss å finne ut korleis vi kan bruke bilen best mogleg i opplæringa, fortel Inge.

Vi i BOK-sfj takkar så mykje for bilen og gler oss til å ta den i bruk i opplæringa. Med bilen får lærlingar og elevar moglegheit til å bli kjent med den nyaste teknologien i bilbransjen. Det er verdifull erfaring å ha med seg vidare ut i arbeidslivet.