Vi køyrer på med nytt infomagasin
Roald Standnes • opplæringskontoret for bilfag i Sogn og Fjordane
Vi har laga eige magasin om bilfaga i Sogn og Fjordane – her du kan lese om kvifor ungdommane vel bilfaget.
Bilbransjen i Sogn og Fjordane står støtt og samla, og har i mange år sjølv stått ansvarlege for siste delen av fagopplæring i bilfaga. Mange av bilbedriftene i Sogn og Fjordane nyttar seg av den kvalitetssikringa som Bilbransjens opplæringskontor (BOK) tilbyr. Dei siste 25 åra har minst 868 lærlingar fått vidaregåande opplæring i bilfag i alle delar av Sogn og Fjordane.
Produsentar av køyretøy konkurrerer om å tilby dei mest attraktive modellane, noko av det som gjer bilbransjen spennande. Vi er der det skjer, med ny og gammal teknologi. Nye tekniske løysingane har ikkje alltid tolt «tidas tann», men mange negative spådommar har og blitt gjort til skamme. Eit godt døme på dette er katalysatoren som blei montert frå ca. 1988 på bensinbilar. Den kunne ikkje vare så lenge, var påstanden. Idag veit vi at den kan vare heile bilens levetid, og at den har redusert forureining dramatisk. Av og til er det freistande å meine at gamle bilar var best. Dei var kanskje enklare og meir oversiktlege før, men samanliknar vi objektivt så vinn det nye køyretøyet på dei fleste måtar.
I dette magasinet blir du litt kjent med fleire engasjerte lærlingar som satsar på fagutdanning. Alle er ulike og unike, og har ulike draumar, men dei satsar på ei fagutdanning som kan gje dei arbeid nærast over alt i Noreg. Det er eit trygt val – både i gode og dårlege tider.Håpet er at vi kan reparere meir i framtida, slik at lokale verkstader både stiller diagnosen og reparerer komponentane.
Arbeidsmiljø er viktig. Ein kjekk jobb, fine lokalar og god løn er ikkje nok for å kunne trivast på jobb. Tvert imot kan andre ting vere vel så viktig, du må bli sett og anerkjent for at du skal trivast. Alle bilbedriftene jobbar for at dette skal fungere, men det er eit kontinuerleg arbeid som aldri kan leggast ned.
Det er viktig at du som ny lærling stiller krav til bedrifta, samtidig som du spør deg sjølv om kva eg kan gjere for at arbeidsmiljøet skal vere godt.